NÝTT: Besta fjárfestingin?

Ekki er ýkja langt síðan við réðum litlu um okkar eigið heilsufar. Þá voru smitsjúkdómar og næringarskortur sem drógu flesta til dauða og lítil úrræði í boði. Í dag getum við komið í veg fyrir verstu smitsóttir og höfum aðgang að fjölbreyttu fæðuvali en eftir situr að 86% ótímabærra dauðsfalla má rekja til óheilbrigðra lífshátta. Auk þess býr stór hluti okkar við slök lífsgæði vegna heilsubrests. Þekking okkar í dag sýnir að við getum ekki einungis komið í veg fyrir skæðustu smitsóttir heldur einnig stærsta hluta ótímabærra dauðsfalla með því að fjárfesta í eigin heilsu til frambúðar. 

Í fyrirlestrinum verður farið yfir hvernig framfarir í vísindum hafa gjörbreytt hvaða þættir ógna heilsu nútímamannsins. Fjallað verður um heilbrigða lífshætti sem hægt er að tileinka sér með einföldum hætti til að verja sig gegn algengum lífsstílstengdum sjúkdómum. Einnig verður fjallað um þætti sem rannsóknir hafa sýnt að stuðli að hamingju og vellíðan.

Fyrirlesarar:
Dr. Lára G. Sigurðardóttir er læknir hjá Krabbameinsfélaginu og doktor í lýðheilsuvísindum. Hún hefur haldið fjölda fyrirlestra um áhrif lífsstíls á heilsu og niðurstöður rannsókna sem hún hefur unnið að, meðal annars á alþjóðlegum ráðstefnum. Lára er einn af stofnendum vefsíðunnar Heilsan okkar (www.heilsanokkar.is) og skrifar reglulega heilsutengda pistla sem byggðir eru á vísindarannsóknum og/eða sérfræðiþekkingu. Hún gaf einnig út bókina “Útivist og afþreying fyrir börn” í lok árs 2012 og heldur úti vefsíðunni Útipúkar (www.utipukar.is).

Edda B. Þórðardóttir er nýdoktor við Læknadeild Háskóla Íslands og sinnir kennslu við þá stofnun. Edda er með doktorsgráðu í lýðheilsuvísindum og með bakgrunn í sálfræði. Helstu rannsóknir hennar eru á sviði áfallafræða og hefur hún haldið fjölmörg erindi bæði á innlendum og erlendum ráðstefnum tengt því fagi. Edda er einnig einn stofnenda vefsíðunnar Heilsan okkar. 

 

Dr. Lára G. Sigurðardóttir

Edda Björk Þórðardóttir


Skráning á póstlista  |    |