Það er allt í lagi að leggja sig á daginn

Í fyrra lenti Sigga, helmingur hljómsveitarinnar í því að brenna út, kulna. Hún vann yfir sig, gerði of margt, tók að sér of mikið og endaði í kulnun sem hún vissi varla hvað var á þeim tíma. Við gripum tækifærið og fórum að rannsaka þetta samfélagsmein og hvernig það kemur til og komumst að því að Sigga er ekki ein. Af hverju erum við svona yfirkeyrð? Er ekki passlegt að vinna fulla vinnu, sjá um heimilið, fara í ræktina og stunda núvitund, kaupa inn og fara með bílinn í skoðun? Er þetta nokkuð mál? 

Afraksturinn er þessi fyrirlestur í tali og tónum sem við vonum að sé um leið afslappandi og uppfræðandi og kannski að þið brosið út í annað.

Meira um okkur: 
Hljómsveitin Eva samanstendur af tónlistarkonunum og sviðshöfundunum Sigríði Eir Zophoníasardóttur og Völu Höskuldsdóttur. Hljómsveitin Eva er þekkt fyrir töfrandi og líflega framkomu sem kemur áheyrendum sífellt á óvart, kitlar hláturtaugarnar og snertir hjörtun um leið. 

Hljómsveitin er í senn tveggja kvenna popphljómsveit sem spilar og semur hugljúf lög um aðkallandi málefni, og um leið sviðslistateymi. Einnig hafa þær verið athvæðamiklar í útvarpþáttagerð um hinar ýmsu hliðar lífsins og þar má helst nefna útvarpsleikritið Það er allt í lagi að leggja sig á daginn sem var flutt haustið 2016 og tekur á því útbreydda samfélagsmeini kulnun.

Hljómsveitin Eva hlaut Grímu tilnefningu fyrir tónlist sína sem samin var fyrir Gullna hliðið sem var sett upp af Leikfélagi Akureyrar árið 2014 og fyrsta plata sveitarinnar, Nóg til frammi, kom út í lok árs 2014. 

 Hljómsveitin Eva samanstendur af frumlegu og krafmiklu tvíeyki sem nálgast stórt vandamál með jákvæðum og eftirminnilegum hætti. Ég hugsa að allir geti tengt við erindi þeirra enda streituvaldar alltumlykjandi í nútímasamfélaginu og forvarnir mikilvægar.