Hvað er það sem gerir okkur kleift að takast á við mótlæti, vinna úr erfiðri reynslu og halda áfram þótt á móti blási? Hvers vegna virðast sumir einstaklingar eiga auðveldara með að ná sér eftir áföll og takast á við áskoranir lífsins en aðrir?
Svarið liggur að hluta til í seiglu (e. resilience), sem er hæfni okkar til að takast á við erfiðleika, aðlagast breyttum aðstæðum og ná okkur á strik eftir mótlæti. Seigla er ekki meðfæddur eiginleiki sem við annaðhvort höfum eða höfum ekki, heldur hæfni sem hægt er að þjálfa og efla.
Rannsóknir sýna að hugsunarháttur okkar hefur mikil áhrif á hvernig við upplifum og bregðumst við því sem gerist í lífi okkar. Við þróum með okkur ákveðin hugsanamynstur sem móta hvernig við túlkum atburði, metum eigin getu og tökumst á við áskoranir. Með því að verða meðvitaðri um þessi mynstur og læra að breyta þeim getum við styrkt seiglu okkar og aukið hæfnina til að takast á við mótlæti.
Í þessum fróðlega og hagnýta fyrirlestri er fjallað um sjö lykilþætti seiglu samkvæmt hugmyndafræði Karen Reivich og Andrew Shatté, höfunda bókarinnar The Resilience Factor. Farið er yfir hvernig þessir þættir birtast í daglegu lífi og hvernig við getum með markvissum hætti eflt innri styrk okkar, aukið sveigjanleika í hugsun og tekist betur á við áskoranir í lífi og starfi.
Fyrirlesari: Ingrid Kuhlman, MSc í hagnýtri jákvæðri sálfræði, þjálfari og ráðgjafi hjá Þekkingarmiðlun.
