Við þekkjum það flest að vakna á röngum fæti. Stundum nægir eitt augnaráð í spegilinn að morgni til að sannfærast um að dagurinn verði ömurlegur. En hvað er það eiginlega sem við sjáum? Hvernig getum við vitað fyrir fram hvernig dagurinn mun þróast? Og hvers vegna leyfum við orðum og viðbrögðum annarra að hafa svona mikil áhrif á líðan okkar?
Hugsanir okkar og viðhorf hafa meiri áhrif á daginn en við gerum okkur oft grein fyrir. Neikvæðar hugsanir geta auðveldlega komið okkur inn í vítahring þar sem hvert smáatvik virðist staðfesta að allt sé að fara úrskeiðis. En sem betur fer getum við lært að rjúfa þann hring og snúa þróuninni okkur í hag.
Í þessum líflega fyrirlestri fá þátttakendur hagnýtar hugmyndir og einfaldar aðferðir til að takast á við neikvæðar hugsanir, breyta viðhorfum sínum og hafa jákvæð áhrif á eigin líðan.
Með húmor, jákvæðni og meðvitaðri hugsun lærum við að sjá hlutina í nýju ljósi, taka mótlæti með meiri yfirvegun og láta ekki smáatvik eyðileggja daginn. Markmiðið er einfalt: Að læra að hafa meiri áhrif á eigin líðan og gera fleiri daga að góðum dögum.
Fyrirlesari: Ingibjörg Gunnarsdóttir. Hún hefur lokið prófi í mannauðsstjórnun í Gautaborg og býr yfir áralangri reynslu af starfsmannastjórnun, meðal annars hjá Domino’s. Í dag starfar hún sem leiðsögumaður og fyrirlesari.
