Flest okkar verða einhvern tíma á lífsleiðinni fyrir erfiðri reynslu, svo sem ástvinamissi, slysi, alvarlegum veikindum eða ofbeldi. Slíkir atburðir geta haft djúpstæð áhrif á andlega og líkamlega heilsu okkar. En hvers vegna jafna sumir sig tiltölulega fljótt á meðan aðrir glíma við langvarandi afleiðingar? Hvað ræður því hvernig við bregðumst við áföllum og hvernig getum við best stutt þau sem takast á við sorg og erfiða lífsreynslu?
Í fyrirlestrinum verður fjallað um þekkt áhrif áfalla á heilsu og líðan, með sérstakri áherslu á áfallastreitu og þær afleiðingar sem geta fylgt í kjölfarið. Farið verður yfir þekkta áhættuþætti sem geta aukið líkur á langvarandi vanlíðan, en einnig þá verndandi þætti sem rannsóknir hafa sýnt að geti stuðlað að betri líðan og bata eftir áföll.
Jafnframt verður fjallað um mikilvægi félagslegs stuðnings og hvernig við getum sýnt skilning, veitt stuðning og hjálpað þeim sem standa frammi fyrir erfiðum aðstæðum.
Fyrirlesari: Dr. Edda B. Þórðardóttir. Hún er doktor í lýðheilsuvísindum við læknadeild Háskóla Íslands, þar sem hún sinnir einnig kennslu. Hún hefur bakgrunn í sálfræði og hefur einkum stundað rannsóknir á sviði áfallafræða. Edda hefur haldið fjölmörg erindi um rannsóknir sínar á innlendum og erlendum ráðstefnum og er einn af stofnendum vefsíðunnar Heilsan okkar.
