Það er ekki ýkja langt síðan við höfðum lítil áhrif á eigið heilsufar. Smitsjúkdómar og næringarskortur voru meðal helstu dánarorsaka og fá úrræði stóðu til boða. Með framförum í læknavísindum, bættum lífsskilyrðum og aukinni þekkingu á heilsu hefur staðan gjörbreyst. Í dag eru það meðal annars lífsstílstengdir sjúkdómar sem ógna heilsu okkar og lífsgæðum: 86% ótímabærra dauðsfalla má rekja til óheilbrigðra lífshátta. Góðu fréttirnar eru þær að við getum sjálf haft veruleg áhrif á áhættuna.
Rannsóknir sýna að heilbrigðir lífshættir geta dregið úr líkum á ýmsum algengum sjúkdómum, stuðlað að betri líðan og aukið líkurnar á lengra og heilsusamlegra lífi. Það þarf ekki alltaf stórtækar breytingar til að ná árangri. Lítil, markviss skref í daglegu lífi geta skipt miklu máli þegar til lengri tíma er litið.
Í fyrirlestrinum verður fjallað um hvernig framfarir í vísindum hafa gjörbreytt þekkingu okkar á heilsu og þeim þáttum sem helst ógna henni. Farið verður yfir helstu lífsstílstengdu áhættuþættina og kynntar einfaldar, gagnreyndar leiðir til að efla heilsu og draga úr líkum á algengum langvinnum sjúkdómum.
Einnig verður fjallað um hvað rannsóknir hafa leitt í ljós um hamingju, vellíðan og lífsgæði og hvernig við getum með meðvituðum ákvörðunum lagt grunn að heilbrigðara og innihaldsríkara lífi.
Fyrirlesari: Dr. Edda B. Þórðardóttir. Hún er doktor í lýðheilsuvísindum við læknadeild Háskóla Íslands, þar sem hún sinnir einnig kennslu. Hún hefur bakgrunn í sálfræði og hefur einkum stundað rannsóknir á sviði áfallafræða. Edda hefur haldið fjölmörg erindi um rannsóknir sínar á innlendum og erlendum ráðstefnum og er einn af stofnendum vefsíðunnar Heilsan okkar.
