Áfengi hefur fylgt mannkyninu í þúsundir ára. En þótt við höfum lengi þekkt áhrif þess á hegðun og líðan er það ekki fyrr en á síðustu áratugum sem rannsóknir hafa varpað skýrara ljósi á hvernig Bakkus leikur líkama og sál.
Áfengi hefur áhrif á bæði líkamlega og andlega heilsu, allt frá starfsemi heilans og vitrænni getu til svefns, orku og almennrar vellíðunar. En hversu mikið vitum við í raun um þessi áhrif? Hvað gerist í líkamanum þegar við drekkum mikið magn á stuttum tíma? Er hollt að fá sér eitt glas á dag? Getur áfengi komið í stað næringar? Og er séniver fyrir svefninn jafn góð hugmynd og sumir halda?
Í þessum fróðlega fyrirlestri er fjallað um áhrif áfengis á líkama og huga í ljósi nýjustu rannsókna. Með áhugaverðum staðreyndum, skýrum útskýringum og kunnuglegum dæmum er ýmsum lífseigum hugmyndum um áfengi velt upp og leitast við að greina á milli staðreynda og mýtna.
Markmiðið er ekki að predika yfir fólki, heldur að veita því þekkingu og innsýn sem gerir því kleift að taka upplýstari ákvarðanir um eigin áfengisneyslu og samband sitt við Bakkus.
Fyrirlesari: Lára G. Sigurðardóttir, læknir og doktor í lýðheilsuvísindum
