Íslenskan er rík af skemmtilegum og myndrænum orðatiltækjum sem auðga málið og gefa samskiptum okkar skemmtilegan blæ. En það er ekki alltaf auðvelt að átta sig á merkingu þeirra eða uppruna. Stundum læðist jafnvel Bibba á Brávallagötunni inn í samræðurnar og þá getur útkoman orðið ansi kostuleg!
Hvað þýðir til dæmis að „eiga borð fyrir báru“? Auðvelt er að ímynda sér að hana Báru vanti borð en orðatiltækið er komið úr sjómannamáli og vísar til þess að alltaf verður að vera nægilega mikið borð (spýta í árabát) til að taka ölduna sem skellur á bátnum. Ef ekki er gert ráð fyrir bárunni þá fyllist báturinn auðvitað af sjó og sekkur! Það er því mikilvægt að eiga borð fyrir báru, bæði á sjó og í lífinu!
Og hvað með að „leggja höfuðið í bleyti“? Hvers vegna ættum við að dýfa höfðinu í vatn þegar við þurfum að hugsa okkur vel um? Skýringin á þessu er byggð á lélegri þýðingu úr dönsku „að lægge sit hoved i blød“, en það merkir að menn leggja höfuðið á eitthvað mjúkt, t.d. kodda, og hugsa djúpt. En blød var einfaldlega þýtt á íslensku sem bleyti!
Í þessum bráðskemmtilega fyrirlestri verður farið yfir fjölmörg kunnugleg rammíslensk orðatiltæki, merkingu þeirra og uppruna. Með húmor og skemmtilegum dæmum fá þátttakendur nýja sýn á íslenskuna og uppgötva hversu margt leynist á bak við orð og orðasambönd sem við notum dagsdaglega.
Fyrirlesari: Eyþór Eðvarðsson, MA í vinnusálfræði, þjálfari og ráðgjafi hjá Þekkingarmiðlun
