Við höfum öll lent í ágreiningi og flest eigum við okkar eigin uppáhaldsaðferð til að takast á við hann, hvort sem hún virkar eða ekki! Sumir sækja í átök, skerpa á andstæðum og hafa jafnvel gaman af því að ögra öðrum. Aðrir leggja allt kapp á að halda friðinn, forðast árekstra eða gefa eftir þegar á reynir. Enn aðrir reyna að finna málamiðlun og mætast á miðri leið.
Ágreiningur getur dregið fram hliðar á okkur sjálfum sem við áttum okkur ekki alltaf á. Þegar tilfinningar eins og reiði, óöryggi eða ótti taka yfir getur orðið erfiðara að hlusta, hugsa skýrt og finna farsæla lausn. En hvers vegna bregðumst við svona ólíkt við ágreiningi og hvernig getum við lært að takast betur á við hann?
Ágreiningur er óhjákvæmilegur hluti af samskiptum okkar, bæði í starfi og einkalífi. Hann þarf þó alls ekki að vera neikvæður. Þvert á móti geta ólík sjónarmið verið uppspretta nýrra hugmynda, stuðlað að betri ákvörðunum og styrkt samstarf, ef rétt er að málum staðið.
Á vinnustöðum, þar sem teymisvinna og sameiginleg ákvarðanataka skipa sífellt stærri sess, er hæfnin til að takast á við ágreining sérstaklega mikilvæg. Eitt lykilatriðið er að leitast við að skilja sjónarmið annarra áður en við gerum kröfu um að aðrir skilji okkur.
Í þessum fræðandi fyrirlestri er fjallað um ólíkar aðferðir til að takast á við ágreining, kosti þeirra og galla og við hvaða aðstæður hver þeirra getur reynst árangursríkust.
Fyrirlesari: Eyþór Eðvarðsson, MA í vinnusálfræði, þjálfari og ráðgjafi hjá Þekkingarmiðlun
