Flestir halda að skynsami og vel gefni samstarfsmaðurinn taki yfirvegaðar og rökréttar ákvarðanir. En það er nú öðru nær! Heilinn í honum, rétt eins og í okkur hinum, er langt frá því að vera gallalaus. Framleiðsluvillurnar eru fjölmargar og þær geta haft ótrúleg áhrif á hugsanir okkar, tilfinningar og hegðun.
Tilfinningarnar leiða okkur oft á villigötur og einfaldar hugsanavillur geta slegið okkur út af laginu. Tökum sem dæmi hörmungahyggjuna, þegar við sannfærum okkur um að allt sé að fara til fjandans. Bjartsýnisbölið er ekki endilega skárra, þegar við þverneitum að horfast í augu við staðreyndir og höldum því fram að glasið sé hálffullt þótt það sé nánast tómt!
Sem betur fer getum við lært að þekkja þessar hugsanavillur og jafnvel leiðrétt sumar þeirra. En það er auðvitað hægara sagt en gert, sérstaklega þegar við teljum að vandamálið liggi fyrst og fremst hjá öðrum!
Í þessum fjöruga og bráðskemmtilega fyrirlestri er skyggnst inn í undarlegan heim mannlegrar hugsunar og hegðunar. Fjallað er um hugsanavillur, rökleysu og ýmsar kunnuglegar manngerðir, svo sem nöldrarann, vitringinn og einræðisherrann.
Allt er þetta sett fram á leikrænan og gamansaman hátt þar sem þátttakendur fá tækifæri til að hlæja að sjálfum sér og kannski uppgötva að erfiðasta manneskjan á vinnustaðnum er stundum sú sem blasir við í speglinum!
Fyrirlesari: Eyþór Eðvarðsson, MA í vinnusálfræði, þjálfari og ráðgjafi hjá Þekkingarmiðlun
