Samskipti geta verið flókin og þegar við bætast tungumálahindranir, ólíkar menningarvenjur, viðhorf og væntingar getur auðveldlega komið upp misskilningur. Það sem einum þykir sjálfsagt getur verið framandi fyrir öðrum og það sem er túlkað sem kurteisi í einu menningarsamfélagi getur haft allt aðra merkingu í öðru.
Íslenskt samfélag hefur tekið miklum breytingum á undanförnum árum og fjölbreytileiki þess hefur aldrei verið meiri. Fólk frá ólíkum heimshornum starfar nú hlið við hlið á íslenskum vinnustöðum og færir með sér fjölbreytta reynslu, þekkingu og sjónarhorn. Þessi þróun skapar fjölmörg tækifæri en getur jafnframt haft í för með sér áskoranir í samskiptum og samstarfi.
Í þessum fróðlega fyrirlestri er fjallað um samskipti á fjölmenningarlegum vinnustöðum og hvernig menningarlegur bakgrunnur okkar hefur áhrif á það hvernig við hugsum, hegðum okkur og túlkum orð og athafnir annarra. Með fræðilegri innsýn, hagnýtum ráðum og skemmtilegum dæmum fá þátttakendur verkfæri til að draga úr misskilningi, efla gagnkvæman skilning og byggja upp traust og árangursríkt samstarf.
Markmiðið er að auka öryggi og færni í samskiptum þvert á tungumál og menningarheima og hjálpa þátttakendum að sjá fjölbreytileikann sem styrkleika í daglegu starfi.
Fyrirlesari: Ingrid Kuhlman, MSc í hagnýtri jákvæðri sálfræði, þjálfari og ráðgjafi hjá Þekkingarmiðlun
