Fyrirlestrartækni Námskeið sem henta öllum Lengd: 6 klst og skiptist í tvo hluta (2x3 klst). Námskeiðslýsing Margir þurfa í starfi sínu að halda kynningar eða fyrirlestra um ýmis efni. Þegar flytja á fyrirlestur er undirbúningurinn lykilatriði en í honum felst í fyrsta lagi að skilgreina markhópinn því erindið þarf m.a. að taka mið af bakgrunni áheyrenda, aldurssamsetningu, kyni, þekkingu þeirra á og reynslu af efninu. Einnig þarf markmiðið að vera skýrt: Er markmiðið að hafa áhrif á fólk, að fræða eða fyrst og fremst að skemmta? Einnig er gott að gera sér grein fyrir aðstæðum, uppröðun borða, notkun hjálpartækja, lengd ræðu o.fl.  Fyrirlestur samanstendur yfirleitt af opnun, meginmáli og samantekt. Hann þarf að vera vel uppbyggður og skýr. Áhrifarík opnun krefst góðs undirbúnings og fyrstu áhrif fyrirlesarans hafa mikið um það að segja hvernig til tekst með fyrirlesturinn. Miklu máli skiptir að enda á eftirminnilegan hátt, t.d. með tilvitnun, mynd, eða fullyrðingu. Uppbygging meginmálsins, sem tekur yfirleitt um 70% af tímanum, verður að vera rökréttur og efnisþættir fáir og skýrir.  Besta leiðin fyrir fyrirlesara til að ná athygli og halda henni er að koma efninu frá sér með sannfæringu, krafti og eldmóð. Með því að hækka og lækka róminn, beita líkamstjáningu, nota svipbrigði, handahreyfingar, endurtekningar og þagnir getur fyrirlesari hrifið áheyrendur með sér. Glærur geta verið gagnlegar til að ná athygli og undirstrika fyrirlesturinn. Með því að styðjast við glærur tryggir fyrirlesari einnig að áheyrendur noti fleiri skynfæri við að meðtaka upplýsingar. Á námskeiðinu fá þátttakendur þjálfun í að flytja fyrirlestra fyrir framan hóp af fólki. Farið er í mismunandi tegundir og markmið fyrirlestra, uppbyggingu fyrirlestra, framkomu og tjáningu, samspil fyrirlesara og umhverfis og að ná og halda athygli. Þátttakendur flytja ræður, bæði óundirbúnar og undirbúnar. Leiðbeinandi Eyþór Eðvarðsson eða Ingrid Kuhlman, þjálfarar og ráðgjafar hjá Þekkingarmiðlun ehf. Meðal þess sem er tekið fyrir: Hvað einkennir góðan fyrirlestur? Væntingar þeirra sem hlýða á. Hvernig kem ég efninu best til skila? Að gera fyrirlestur áhrifaríkari. Framkoma og tjáning. Að ná og halda athygli. Samspil ræðumanns og umhverfis. Notkun hjálpartækja. Ávinningur Betri og markvissari framsetning. Betri uppbygging fyrirlestra. Meira öryggi í framkomu fyrir framan hóp af fólki. Áhrifameiri framsetning. Kennsluaðferðir Stuttir fyrirlestrar. Kynningar og ræður. Verklegar æfingar. Umræður.